សៀមរាប៖ កម្មវិធីសំណេរតាមអានលើកទី១ «សំណេរអង្គរ» បានចាប់ផ្ដើមនៅស្ពានហាលប្រាសាទអង្គរវត្ត កាលពីថ្ងៃទី ២១ ខែមករា ឆ្នាំ២០២៤ ដោយមានអ្នកចូលរួមប្រមាណ ៧០០អង្គ/នាក់ ដែលមកពីបណ្ដាខេត្តនានា។

រដ្ឋមន្រ្តីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា លោកស្រី ភឿង សកុណា បានចូលរួមជាអធិបតីភាព កម្មវិធីប្រឡងសរសេរតាមអាន «សំណេរអង្គរ» លើកទីមួយ នៅលើស្ពានហាលខាងលិចប្រាសាទអង្គរវត្ត នាព្រឹកថ្ងៃទី២១ ខែមករា ឆ្នាំ២០២៤ ដែលមានបេក្ខជនចូលរួមជាង ៧០០ អង្គ/នាក់។

នាព្រឹត្តិការណ៍នោះដែរ លោកស្រី ភឿង សកុណា បានអានអត្ថបទប្រឡងទៅកាន់បេក្ខជនក្នុងរយៈពេលមួយម៉ោង ដែលអត្ថបទទាក់ទងនឹងរមណីយដ្ឋានអង្គរ ជាការរៀបចំសម្រិតសម្រាំងទុកដោយឧបនាយករដ្ឋមន្រ្តី ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ក្រោមចំណងជើងថា «អង្គរ អាណាចក្រនៃអរិយធម៌ខ្មែរ»។

ជ័យលាភីកំពូល៣រូប ក្នុងព្រឹត្តិការណ៍ សំណេរអង្គរ នោះគឺ បេក្ខជន ចេង រតនា ទទួលបានជ័យលាភីលេខ១ បេក្ខជន វ៉ន វីដា បានលេខ២ និងបេក្ខនារី យ៉ោប សុឃាក់ បានលេខ៣។

គួរឱ្យដឹងដែរថា កម្មវិធីសំណេរអង្គរ ជាកម្មវិធីថ្មីដែលបង្កើតឡើងក្នុងបំណងលើកកម្ពស់អក្សរសាស្រ្តខ្មែរ តាមរយៈការប្រឡងប្រជែងសរសេរតាមអាន។ កម្មវិធីនេះក៏អាចនឹងក្លាយជាព្រឹត្តិការណ៍ថ្នាក់ជាតិជាប្រចាំឆ្នាំផងដែរនាពេលអនាគត៕